MADAYUN ang open pit mining operation sa SMI sa Tampakan, South Cotabato kung tugutan ni Gov. Reynaldo Tamayo nga ma-lift sa hingpit ang ban sa open pit mining.
Kini ang gibutyag ni Engr. Constancio Paye Jr., Presidente sa Mindanao Association of Mining Engineers ug SMI technical consultant nga dako ang posibilidad nga madayun ang pagmina sa Tampakan area kung dili i-veto sa gobernador ang amenda sa Environmental Code nga nagtugot sa open pit mining.
Giklaro ni Paye nga surface mining ang tawag sa mahimong pagmina nga globally accepted mining method, asa sa presentasyon, ang open pit mining sulod sa 10 ka tuig ang maglangkob sa 140 hectares nga bukid ang minahon.
Murag sama matud pa sa Banawe rice terraces ang pagmina asa gamitan og floaters o chemical nga less potent sa cyanide ug mercury ug mogamit usab og explosives apan kontrolado ug dili makadaut sa mga minero.
Samtang gibutyag ni Paye nga tanang operasyon ang musubay sa patakaran nga nalatid sa Mining Act of 1995 asa may mugnang multi partite monitoring team aron magsiguro ang safety ug pagtuman sa environmental protection.
