Daina E. Gerona
Nag-abot na, matapos ang malawig nga mga tini-on nga pagpangabay kag pagpangamuyo sang pila ka mga senior citizens nga nagapang-edaron sang 85-89 anyos sa syudad sang Kabankalan.
Ini amo pagkatapos nga aprubado na ang isa ka inisyatibo sang lokal nga kagamhanan sang syudad sa paghatag sang ‘one time’ ukon maka-isa lamang nga ayuda pinansyal nga nagabalor sang P 12, 000 kada senior citizen.
Sa interbyu nga ginpatigayon sang Brigada Kabankalan sa kay City Social Welfare and Development Office (CSWDO) Head, Cyril Ramos, ginklaro niya nga wala ini sang kana-an ukon limitasyon, nga buot silingon kwalipikado ang tanan nga yara sa nasambit nga pang-idaron, may pension man nagikan sa SSS, GSIS, AFP, SOCPEN kag iban pa, ang importante nga may yara sang pamatu-od nga residente ang mga senior citizens nga mag-apply sang nasambit nga syudad.
Dugang pa ni Ramos, ang amo nga serbisyu ang isa ka simbolo sa paghatag sang kadungganan sa mga kadalag-an kag progreso sang syudad sa ti-on pa sadto anay sang yara karon sa estado sang katigulangon.
Nahiblu-an nga kalakip sa mga nagapanguna nga kinahanglanon nga mga dokumento agud nga mangin kwalipikado sa amo nga programa amo tag tatlo ka kopya ang Senior Citizen ID, Birth Certificate, kag kon wala, pagabatunon man ang (COMELEC ID, HUMID CARD, SSS, GSIS, ukon Philippine Passport – bisan diin diri), kag Marriage contract (kon kasado), samtang kon wala ang isa sa mga ini, pwede man ang Birth Certificate sang subang kag agot nga bata kaupod ang ila valid ID, kag Certificate of Residency ukon Barangay Clearance.
Angut sini, ginklaro man ni Ramos nga magluwas sa mga impormasyon nga nagikan mismo sa ila nga talatapan, wala na sang mas lihitimo pa nga impormasyon ka-angay na lamang sang nagalapta nga ATM para sa mga seniors nga kinahanglan pa sang P500 para sa deposit, sa baylo kon may yara gid man sang pay out ang mga seniors ini direkta kag wala sang iban pa nga balayran.
