Daina E. Gerona
Mangin mahapos kag madali na ang pagresponde ilabi na sa pagdul-ong sang mga pagka-on sa mga evacuees sa mga barangay nga nasakupan sang syudad sang Kabankalan sa ti-on sang kalamidad.
Ini pagkatapos nga nag-abot na ang panibag-o nga customized mobile kitchen sang syudad sang tinalikdan nga adlaw, nga may yara sang duha ka mga lababo, nga mangin hulugasan, tatlo ka burner agud lutu-an, cabinets para sa mga utensils, container tank nga maka-akomodar sang kapin 200 litros nga tubig, subong man may yara sang bakante nga pwede pagapreparahan sang lulutu-on.
Base sa interbyu nga ginpatigayon sang Brigada Kabankalan sa City Social Welfare and Development Office (CSWDO) Head, Cyril Ramos nga ang amo nga inisyatibo ang ginduso sang tinalikdan pa nga duha ka tuig ang nagligad, sa ti-on sang Disaster Risk Reduction and Management Council (DRRMC) meeting, kun sa diin ila nakit-an ang kabudlayan sa ti-on nga magdul-ong sang mga kinahanglanon nga mga pagkaon sang mga internally displaced person.
Dugang pa ni Ramos nga isa pa sa nagtulod agud pagpangita pa-agi nga maka mobile kitchen ang syudad amo bangud sa ila nga eksperyensya nga kabudlayan ilabi na nga ang kalabana wala sang community kitchen sa ila mga barangay.
Palayag pa niya, nga posible man ini pagagamiton sang nagkalain-lain nga ahensya sang gobyerno ukon civic clubs nga magapatigayon sang feeding program, apang kinahanglan nga maga-upod gid ang isa ka trained personnel agud sa pag operate sang mga mekanismo sang nasambitan nga mobile kitchen.
