Gikompirma sa Department of Health Regional Office 10 nga ika-lima ang Northern Mindanao sa adunay pinakataas og COVID-19 vaccination coverage sa tibuok Pilipinas.
Gibutyag ni DOH-10 Regional Director Dr. Jose Llacuna Jr., nga anaa na ang rehiyon sa 55% nga herd immunity.
Sa maong ihap, 15% na lamang ang kulang aron makab-ot ang target nga 70% nga herd immunity.
Dako ang paglaom ni Dr. Llacuna nga maabot ang target sa hinapos nga bahin ning bulana ilabi na nga nagpadayon pa gihapon ang bakunahan bisan ning holiday season.
Nagpasalamat sab ang nahisgutang opisyal sa stratehiya nga gimugna sa nagkadaiyang Local Government Units aron ma-akomodar ang tanan sektor, gikan sa bakunahan alang sa 1st dose, 2nd dose ug ang pediatric group ug booster shots nga hagit alang kanila.
