Ginmanduan it Bureau of Jail Management and Penology (BJMP) ro tanan nga mga district jail sa Western Visayas nga temporaryong punduhon ro pagbatun it mga non-essential items halin sa guwa nga ginapadaea para sa mga preso.
Mga bueong, bitamina, ag suplemento gid eamang ro pwedeng batunon.
Raya hay base sa pahayag it pamunuan it BJMP Region 6 kung siin, ginapatihan nga ro ibang mga kagamitan nga ginahatud hay posibleng butangan it mga kontrabando kaparehu it mga eagari.
Madumduman nga ku Martes, limang preso ro nakapaeagyo halin sa Negros Occidental District Jail (NODJ).
Gin-utod segun ku mga raya it eagari ro mga iron grills it andang selda.
Sa makarun hay nagaumpisa eon ro imbestigasyun angot sa rayang insidente.
Ro Western Visayas hay may una nga 37 district jails. / ANN DESLENE SALAZAR
