Dili i-renew ang nga kontrata pagsugod sa tuig 2022, kini ang naghulat nga kapalaran sa mga empleyado sa City Government of Davao nga dili fully vaccinated, isip kabahin sa pagpakusog sa kampanya sa City LGU sa COVID-19 vaccination.
Kini ang giluwatang pahayag ni Davao City Mayor Sara Duterte-Carpio alang sa tanang City government employees, kung asa lakip sa mandatory vaccination pag-abot sa 2022 ang mga job orders ug contract of service employee, consultant ug volunteer.
Wala na mihatag og dugang detalye ang Mayor kalabot sa gilaraw nga mandatory vaccination apan gikatakdang magpagawas og executive order kabahin sa maong lakang.
Samtang alang usab sa mga dili pa fully vaccinated nga plantilla o regular nga empleyado pag-abot sa enero uno, posibleng mag-atubang sila og insubordination.
Gisaysay sa mayor nga wala nay rason pa ang mga empleyado nga dili makapabakuna hangtud sa katapusang adlaw sa bulan sa Disyembre karong tuiga sanglit taas-tyaas pa ang panahon aron maka-comply niini.
Kahinumdumang sa milabayng mga pahayag sa alcalde sa disaster radio, daan na niining giluwat nga posibleng ipatuman ang susamang lakang sama sa No Vaccine No entry kini sa higayon nga bastante na ang suplay sa bakuna ug gamay na lang ang boot magpabakuna.
Apan subay usab sa DOLE nga dili mamahimong himoong rekisitos sa employment status ang pagpabakuna ug hugot gibarugan nga bawal ug wala gitugot sa balaud ang “No vaccine no work policy”.
