BICOL—Kasalukuyang umiiral sa bayan ng Virac, Catanduanes ang “No Segregation, No Collection Policy” sa usapin ng pagtatapon ng mga basura mula sa mga residente.
Ito ay dahil hanggang sa ngayon ay nahihirapan pa rin ang lokal na pamahalaan na makahanap at makabili ng lote na pwedeng pagtayuan ng sanitary landfill.
Ganunpaman, sakabila ng umiiral na polisiya ay hirap pa ring makasunod ang mga residente sa nasabing lugar kahit na nagpadala na ang LGU ng advisory letter sa bawat households ng 63 barangay ng Virac, kaugnay ng tamang pagtatapon at paghihiwa-hiwalay ng mga basura.
Patunay dito ang mga nakunang larawan ng lokal na pamahalaan kung saan sa mismong signage pa ng “No Segregation, No Collection Policy” sa isang barangay, itinipon ng mga residente ang halo-halong uri ng basura.
Matatandaang una nang nakiusap ang lokal na pamahalaan ng Virac na matamang sundin ang naturang polisiya, lalo na at nakakaranas sila ngayon ng limitasyon sa waste disposal matapos na ipasara ng DENR-EMB ang dumpsite sa Brgy. Casoocan.###
