KABANKALAN CITY, Negros Occidental — Nagakulosmuron ang mga kunsomidor sang Negros Occidental Electric Cooperative (NOCECO) sa syudad sang Kabankalan, matapos nga gin-siling sang mga katapo sang kooperatiba nga maga-pangutod sila gihapon sang kuryente sa bulan sang Mayo, apisar sa reklamo sang mga kunsomidor nga halos nag doble nga pagsaka sa ila mga bill sang kuryente.
Sa ginpatigayon nga public inquiry sang City Planning and Development Office sang Kabankalan, sang Huwebes, Mayo 23, nagpabutyag sang sentimyento si Juvy Estoque, isa ka kunsomidor, nga dapat magdihon sang kongkreto nga plano ang NOCECO agud mabuligan ang mga kunsomidor nga naapektuhan sang pagsaka sang kuryente.
Dugang pa ni Estoque nga kuntani pahanugutan ang “staggered” ukon amat-amat nga pagbayad sang mga kunsomidor sa ila bill sang kuryente sa bulan sang Mayo, agud matunga-tunga nila ang ila income sa mga balayran kada bulan.
Sa pahayag naman ni Jocelyn Grace Garcia, communication and customer service manager sang NOCECO, nga ‘pre-mature’ ukon alang-alang pa nga sundon ang amo nga suhestyon, bangud may bulanan nga balayran si NOCECO sa iya power suppliers nga masobra 400 million, kag mabudlayan ang kooperatiba sa pagbayad kun indi sila manukot sa bill sang kuryente.
Dugang pa ni Garcia, nga iya sa giyapon iga-presentar ang nasambit nga suhestyon sa mga temporaryo nga naga-pungko nga executive committee sang kooperatiba, sa diin ang masunod nga regular meeting ang natalana pa sa Hunyo 5.
Apang, sabat ni Estoque, dapat magpatigayon na sang emergency meeting ang executive committee sang kooperatiba agud masolusyonan ang problema sang mga kunsomidor kag Indi na paghulton ang bulan sang Hunyo.*