LEGAZPI CITY – Pigsiyerto kan National Irrigations Administration (NIA) Albay na igwa na sindang piggigiribong paagi asin lakdang nganing magamit na an duwang water pump sa banwaan kan Polangui.
Sa intrevista kan Brigada News FM Legazpi kay NIA Albay Acting Chief Bernardita Balingasa, pigsabi niya na ngunyan na semana, posibleng ngunyan o sa aga, magkakaigwa na ki sarong test run nganing masiyertong functional duwang water pump partikularmente sa Brgy. La Purisima asin Magpanambo.
Segun kay Balingasa, an nahiling na problema sa Magpanambo, diit an tubig sa parteng ibaba na posibleng kawsa kan El Niño asin sa La Purisima, may piggigibo pa sindang lakdang nganing makatipon ki tubig.
Oras na makondusir an test run asin masiyertong functional asin operational na an mga water pump, iti-turnover na ninda su boot ini sa enot na semana kan Setyembre.
Dugang pa ni Balingasa, piggigibo ninda an gabos nganing maresolberan ini huli ta an proyektong water pumps, piggibo para sa mga paraoma kaya dapat ining magamit.
