KABANKALAN CITY, Negros Occidental — Nag-patunga ang National Electrification Administration (NEA) sa pag eksplikar sa mga member-consumer-owners (MCOs) sa tanan nga electric cooperatives sa pungsod, ang rason sa nagataas nga presyo sang kuryente.
Suno kay NEA administrator Antonio Mariano Almeda, ang pagsaka sang bill sa kuryente ang bangud sa pagtaas man sang generation charges sang mga power suppliers sang mga power cooperatives, sa diin gina-pasa ang responsibilidad sa mga kunsomidor.
Dugang pa ni Almeda nga base sa mga reports, naga-dugang pagtaas sang bill sang kuryente, bangud sang mataas man nga heat index nga mabatyagan sa bug-os nga Pilipinas, kag iya gina-alegar, indi na ini makontrol sang mga kooperatiba.
Sa sitwasyon sang Negros Occidental Electric Cooperative (NOCECO), nag taas sang Php 3.3300 per kilowatt hour ang generation rate para sa bulan sang Mayo. Gikan sa Php 14. 6309 pesos per kilowatt hour sang Abril (lakip na ang tanan nga additional charges), nag-dangat na sa Php 17. 9609 pesos per kilowatt hour ang pagabaydan sang mga kunsomidor sa bulan sang Mayo.
Nag-pahayag man sang sentimyento ang isa ka kunsomidor nga si Irene Viason, nahanungod sa gina-alegar kapaslawan sang NOCECO sa pag-pangita sang mas barato nga power supplier agud indi ma tam-an ang mga pumuluyo sa kamahal sang presyo sang kuryente.*