Di pa umano tamang panahon para isailalim na ang NCR Plus sa mas maluwag na restrictions o modified general community quarantine (MGCQ) status pagkatapos ng June 15 sa gitna ng COVID-19 pandemic.
Sa isang panayam, sinabi ni presidential spokesperson Harry Roque na mataas ang tsasang isasailalim ang Metro Manila, Bulacan, Cavite, Laguna, at Rizal sa ordinaryong GCQ simula June 16.
Ayon sa kalihim, mataas pa rin ang COVID-19 cases at di pa nakakabalik ang rehiyon sa bilang ng cases bago pumasok ang mga bagong variants.
Aniya, bago ma-detect ang mga bagong COVID-19 variants sa bansa, nasa 1,000 bagong COVID-19 cases ang naitatala sa Metro Manila kada araw at noon, hindi isinailalim ang NCR sa MGCQ.
Mababatid na nakasailalim ngayon ang NCR Plus sa GCQ with restrictions hanggang bukas.
Nakatakdang magpulong ngayong araw ang Inter-Agency Task Force on Emerging Infectious Diseases (IATF-EID), para talakayin ang susunod na quarantine classifications di lamang sa NCR Plus kundi pati na rin sa ibang areas.
