Inanunsyo ni Health Undersecretary at treatment czar Leopoldo Vega na nakikita na nila ang pag-plateau ng healthcare utilization rate sa National Capital Region (NCR).
Inihayag ito ni Vega matapos palitan ng DOH ang daily COVID-19 case bulletin nito sa weekly basis na ngayon ay nakatutok na sa active severe at critical infections at sa intensive care unit (ICU) utilization.
Sa kabila nito ay tiniyak ni Vega sa publiko na gumagamit pa rin ang DOH ng parehong analytics pagdating sa pag-uulat ng sitwasyon ng mga ospital sa bansa sa gitna ng pandemya.
Ayon kay Vega, naglalaro ang healthcare utilization rate ng bansa sa 19-20%.
Noong Lunes ay naiulat ng DOH na meron 1,055 na severe at critical cases sa bansa, habang nasa 25.7% naman ang ICU utilization rate o 807 mula sa 3,138 na ICU beds sa buong bansa.
Cumulative totals ito na nakabase sa admissions noong March 6.
