PORMAL nang nagduso og reklamo ang unom ka tawo batok sa pipila ka indibidwal nga gireklamong illegal recruiter. Ang gireklamong mga personalidad ang nag-operate nga dili rehistrado ang recruitment agency ug training school.
Matud ni Jeffrey Mosqueda, special investigator sa National Bureau of Investigation- Sarangani District Office (NBI-SARDO) nga gihikutar na nila ang giduso nga reklamo nilang Hazel Agullana ug uban pang kauban niini human midangop kanila.
Samtang aron malikayan nga nambiktima angayang sutaon sa mga buot makakita og maayong trabaho gawas sa nasud kung tinuod ang claim sa mga nagpailang ahente kalabut sa ilang kompanya ug kung kini rehistrado sa Technical Education and Skills Development Authority (TESDA) ingon man sa Philippine Overseas Employment Administration (POEA).
Dugang ni Mosqueda, daghan ang mga indibdwal nga gi-take advantage ang kasamtangang health crisis aron makadani og tawo alang sa ilang kaugalingong interest. Nanawagan kini sa mga nabiktima sa illegal recruiter nga makig-alayon ngadto kanila ug sa kapulisan. l Richel Gubalani
