LEGAZPI CITY – Kinumpirmar kan National Bureau of Investigation (NBI) Bicol na igwa pang mga executioner si Gilbert Saysay Conception, lider kan Conception Criminal Gang.
Sa sarong press conference, sinabi ni Atty. Felipe Jessie Jimenez, team leader kan ahensya, na an saro digdi, pig-train mismo ni Gilbert.
Asin apwera kaini, dakol pang iba na sa ngunyan pighahanap pa ninda.
Tinawan-doon pa digdi na igwa pang sub-groups kumpwesto nin sub-leaders na nagsusuporta sa grupo asin an iba nagtatarago sa ibang rehiyon kan nasyon.
Dugang pa digdi, may mga mata asin assets man giraray sa bilog na banwaan kan Libon orog na ta buhay pa an matitinding sub-leaders kan Conception na pagados paman pighaharanap kan mga otoridad.
Pigsiyerto kan ahensya, an bilog nindang esfuerso, dai mapundo na dai madadakop an mga natatadang sub-groups, mga lider asin iba pang miyembro.
