BICOL – PIGKAKARKOLONG maabot sa labi 250 million pesos na kantidad nin cash aid an naipanao sa irarom kan programa kan Department of Traade and Industry o DTI para sa mga saradit na mga negosyanteng apektado kan pandemya sa rehiyon.
Segun sa DTI-Bicol sa paagi kan saindang Small Business Corporation (SBC) nai-release an nasabing kantidad mom loan para sa nasa labi dos mil kinyentos na mga micro, small and medium enterprises sa irarom kan Bayanihan COVID-19 Assistance to Restart Enterprises o CARES program.
Puon January 1, 2020 hasta July 31, 2021, an probinsya kan Camarines Sur an igwang pinakahalangkaw na loan amount na uminabot sa labi 71 million pesos para sa haros 600 MSMEs beneficiaries; sinundan kan Sorsogon na igwang labi 53 million pesos para sa lampas sais sientos na benepisyaryo asin labi singkwenta y dos milyones de pesos man sa Albay para sat res sientos na MSMEs.
Nakapagpaluwas man nin maabot sa labi bente siete milyones ne pesos na cash aid para sa Camarines Norte asin mga islang probinsya kan Masbate na igwang labi bente singko milyones de pesos asin labi 21 million pesos man para sa MSMEs beneficiaries sa Catanduanes.
Obheto kan Bayanihan CARES program na maasistensyahan an mga saradit na mga negosyo tanganing makabangon sa negatibong epekto kan pandemya asin maibitaran an dagos nang pagsasara o pagkalugi.
Bukas an nasabing programa para sa mga negosyo na isarong taon na sa operasyon o lampas pa, kun saen an loanable amount iyo an dyes mil hasta singko milyones de pesos na igwang grace period nin hasta sarong taon kun saen mayong ipapataw na interes o collateral.
