Nagapangayo makara it bulig ro nanay it sambilog ka overseas Filipino worker nga ginamaltrato segun it anang employer sa Saudi Arabia.
Base sa pahayag it nanay it OFW nga si Elisa Mabasa it New Washington, Aklan, sangka dag-on eun nga nagtrabaho sa Saudi Arabia ro anang unga nga si Christine Joy Mabasa, 26-anyos.
Naghambae segun si Christine Joy sa kapwa OFW nga ginasakit raya it anang amo. Ginakulong ag uwa ginapakaon sa tama nga oras.
Bangud dikara, ang miga ni Christine Joy ag kapwa OFW ro nagreport it anang kahimtangan sa anang pamilya sa Aklan.
May una man nga alegasyon nga ginbuoe segun it anang amo ro cellphone ni Chrisitine Joy rason nga indi raya maka-communicate sa anda.
Ku nagtaliwan nga buean pa ro ulihi nga komunikasyon it OFW sa anang pamilya.
Presente nga nagapangayo it bulig si Elisa nga ma-rescue ag ma-repatriate ro anang unga./JIL B. LACSON
