Reymund Titong
KABANKALAN CITY, Negros Occidental — Nagahampang pa sa P90 milyones nga buwis ang dapat bayaran sang nalugi nga Maricalum Mining Corporation (MMC), nga anay nag-operate sang Bulata Port sa banwa sang Cauayan.
Sa interview kay Mayor John Rey Tabujara, iya ginpahayag nga pila na ka administrasyon ang nagdumala sa lugar, apang asta sa karun wala pa nabayran ang banwa sang ila buwis nga naglab-ot na sa P90 milyones.
Dugang pa sang alkalde, duha ka bulan na ang nakaligad, nagdaog na ang gobyerno probinsyal sa kaso batok sa MMC.
Ginalantaw man ni Tabujara nga mangin dako nga oportunidad para sa banwa ang pagbukas balik sang port, para mapa-uswag pa gid ang lugar.
Dugang pa sang alkalde, may mga negosyante nga interesado mag-invest sa pagbukas sang port, pareho sang Tsuneishi.
Bangud sa gamay lang nga lokal nga kita sang banwa, nga nagaabot lang sa P35-P40 milyones kada tuig, ang pagbukas liwat sang Bulata Port bilang ‘export port’ ang mangin dako nga bulig sa lokal nga ekonomiya, suno kay Tabujara.
Nahibaluan nga nag-untat ang operasyon sang MMC sang 2001, bangud sa pagka-lugi.
“Para mag dako ang aton income, kinahanglan naton ang industriyalisasyon,” pahayag ni Tabujara.
Ginklaro man sang alkalde nga ang Bulata Port indi paga gamiton para sa ‘ship building,’ bangud sa posible nga mga butang nga maka-apekto sa Danjugan Island, isa ka marine and wildlife protected area. –BNFM Kabankalan
