Gi-review na karon og balik sa kapulisan ang CCTV footage nga kuha dool sa lugar kung asa naligsan og trailer truck nga gikamatay sa usa ka babaye sa Km. 27 Lasang, Davao City.
Nahitabo ang insedente pasado alas tres sa kadlawon kagahapon samtang sakay ang biktima nga giilang si Sheila Goliat sa motorsiklo nga gimaneho sa iyang bana.
Sumala kang Bunawan Police Station station commander Police Major Noel Villahermosa, samtang naglawig sa maong dalan ang motorsiklo nga gimaneho ni Renante Goliat kalit nalagpot ang babaye sa inner lane nga maoy gisubay sa truck hinungdan nga malatayan kini.
Ang trailer truck wala makabantay nga duna kini naligsan og nideretso lang sa pagpadagan samtang ang biktima nakahiagum sa grabeng mga samad ug bali sa lawas nga miresulta sa iyang kamatayon.
Ang bana sa namatay ang anaa karon sa taladugon nga kahimtang nga padayong gitambalan sa ospital.
Padayon karong giila ang drayber sa trailer truck pinaagi sa kuhang CCTV footage aron mapanubag sa insedente.BNFM-DAVAO
