Na-recover ang nagkalain-lain nga mga armas luthang, bala kag magazine sa 45-anyos nga lalaki matapos ginserbihan sang search warrant takna alas 5:40 miyerkules sang aga sa Brgy. Cabangahan, Panit-an, Capiz.
Ginkilala ang subject sang operasyon kay Roger Deita Amoroso alyas ‘Nono’ kag residente sa nasambit nga lugar.
Sandig sa report gikan sa Police Regional Office (PRO) 6, nakuha sa paghinakop sang akusado ang apat ka bala sang 12-gauge shotgun; isa ka shotgun; isa ka Llama cal. 380 pistol; isa ka Norinco cal. 9mm pistol; duha ka long-barreled air guns; isa ka magazine sang cal. 380; isa ka magazine sang cal. 45; duha ka magazine sang 9mm; 10 ka bala sang 9mm; walo ka bala sang cal. 380 live; duha ka empty shells sang cal. 9mm; isa ka empty shell sang cal. 380; kag pulo ka empty shells sang cal. 45 pistol kag wala sang mga nagakaigo nga dokumento.
Ang search warrant ginpapanaog ni Hon. Ezperanza Isabel E. Poco-Deslate, Executive Judge, RTC Branch 19, Roxas City, Capiz napetsahan Hunyo 26, 2023.
Magapangatubang si Amoroso sang kaso nga paglapas sa RA 10591 ukon ang ‘Comprehensive Firearms and Ammunition Regulation Act’.
Sa karon, nagapabilin sa kostudiya sang Panitan PNP ang mga armas luthang kag si Amoroso.| KMD Gicalde
