-Reymund Titong
KABANKALAN CITY, Negros Occidental — Inadlaw matapos natumba ang isa ka poste sang telecommunication company sa Kabankalan, ginpahayag sang City Engineer’s Office sang syudad nga tinuig na nga problema sang Kabankalan ang mga kabli sang kuryente nga nagasinambudanay.
Suno kay engineer Zandro Perez, electrical section chief sang Kabankalan City Engineer’s Office, madugay na nga ginasulatan sang syudad ang nagkalainlain nga mga telecommunication companies nga kay-uhon ang mga nagasambudanay nga mga kuryente sini sa syudad, apang wala ini naga-sabat sa mga sulat sang Kabankalan, bisan pa nga mismo ang City Legal Office nagahimo sang sulat.
Dugang pa gid nga problema, suno kay Perez, amo ang paghatag sang mga sulat sa mga natungdan bangud wala opisina ang mga ang nagakalain-lain nga telco company sa Kabankalan, kun indi sa Bacolod pa ukon sa Manila.
Madumduman nga natumbahan sang poste sa dalan J.Y Perez Highway ang isa ka 10-wheeler truck, kag nangin rason man sa pagka-traffic sa lugar sang Hulyo 22. Samtang, may nasiplatan man sa iban pa gid nga mga poste sang telco companies sa syudad nga nagahilay naman.
Dugang pa ni Perez, ang pipila ka rason kun nga-a naga katumba ang mga poste, amo ang pagbug-at sang mga kabli bangud sang pag-ulan, kag pag humok man sang duta. Paglaragway ni Perez, “kadamak” lantawon sang syudad kun ang mga kabli sang kuryente ang nagasinambudanay lang.
Sa piyak nga bahin, iya man ginpahayag nga bisan gustuhon sang ila opisina kay-uhon ang mga kabli sang kuryente, apang wala na sila gahum bilang electrical engineers sang Kabankalan kun tandugon nila ang mga ini.*
