DILI lang mga tanum ang naapektohan tungod sa tumang kainit lakip mga giatiman nga hayop hinay-hinay nang namatay ug nagsakit gumikan sa epekto sa El Niño.
Nangalaya nga tanum nga mais ug dili na mapuslan na samtang nagsakit na ug nangamatay na ang mga hayop gumikan sa tumang kainit.
Kini ang rason sa pagpanawagan og tabang ni Salilang Pasandalan, usa sa nag-atiman og hayop sa Barangay Baluntay, Alabel, Sarangani Province.
Matud ni Pasandalan, kung modugay ang El Niño posibleng mangahurot na og kamatay ang hayop nga giatiman.
Gumikan sa karon, gawas sa pagkaangkon og pinkeye disease o sore eye sa giatiman nga kanding, namayat ug nagluya na usab ang uban pang hayop nila.
Sa bahin ni Dr. Amor Elevazo, Provincial Veterinarian nanghatag na sila og veterinary medicines, bitamina ug ubang biosecurity supplies sa mga naa sa sector sa livestock ug poultry.
Sa karon padayon ang monitoring sa PVO sa epekto sa El Niño sa mga hayop.
