Nagpaguwa it pahayag ro grupong Men Opposed to Violence against Women and their Children Everywhere o MOVE-Aklan.
Ro statement it MOVE-Aklan hay kaangot sa pag viral it sangka restaurant sa banwa it Malinao, Aklan bangud sa andang Valentine’s Day promo nga matsa nakaka insulto sa mga kababaihan, nga para sa iba hay sangka offensive o misogynistic.
Base sa andang pahayag, ro gin-delete nga on line advertisement/promosyon it nasambit nga restaurant sa Malinao, Aklan hay nagpakita it klaro nga mapang-abusong pag-describe sa kababaihan.
Ro advertisement nga nai-post pinaagi sa social media hay nagapakita sa mga babaye bilang sexual objects.
Ro post hay sangka gender stereotyping ag pagpakita it subordinate status it kababaihan bangud ginabase kara ro female sex organ sa price discounts.
Peligroso segun raya para sa mga babayeng kliyente ag pati man sa andang mga babayeng empleyado, bangud base sa mechanics it promo, dapat ipakita it kliyente ro litrato it anang sex organ sa sangka babayeng empleyado para ma-avail ro discount.
Posibleng naisip segun it management it nasambit nga restaurant nga ro andang gimik sa pag-advertise hay magapaabo it andang customer, pero sa tan aw it Move-Aklan, raya hay bukon it manami.
Nakibot man segun ro MOVE-Aklan nga kaabuan sa mga reaksyon it emoji sa nasambit nga post hay nagahibayag, nga sangka klaro it manaba nga level it awareness ag pagiging sensitibo sa gender it mga consumers it media content.
Nasubuan segun ro MOVE-Aklan kung ro mga babaye hay ginamakara, eabi pa ag may una man sanda nga Ina, igmanghud nga baye ag unga nga baye sa komunidad.
Sa pihak it pagpangayo it pasaylo it nasambit nga establisyimento, dapat tandaan nga may mga laye nga naga protekta sa kababaihan.
Owa dapat ginapasugtan ro objectification it mga kababaihan ag ro pag describe sa mga babaye bilang sexual object.
Indi pagpadayunon ro pagpang abuso ag diskriminasyon nga nakabase sa kasarian.
Ginpahayag pa it MOVE-Aklan nga sa nagahilapit nga selebrasyon it National Women’s Month sa buean it Marso, gina-engganyo nanda ro tanan nga magbueoligan it patas para sa gender-fair Province of Aklan. // ANN DESLENE SALAZAR
