Nikalas og kinabuhi, usa ang naangol samtang luwas ra ang usa ka tuig nga bata human gituohang gabie pa sa Hunyo 20, adlawng Huwebes nahulog ang gisakyang motorsiklo niini sa pang pang sa bukirang barangay sa Sitio Crossing, Purok Mangga, Brgy. Campo 4, dakbayan sa Talisay.
Apan kagahapon lang sa udto nabantayan sa dihang adunay manguykoyay og mga bas sa maong lugar, ilang nakita nga adunay lalaki kilid sa sapa ug sa ilang pagpakisusi, aduna pa kini kauban nga babae kinsa mao ang asawa, ingon man bata nga gamay nga ilang anak.
Dali nga nagpakitabang ang maong mga nakakita, gidala sa Cebu South Medical Center ang drayber nga lalaki, samtang gideklarar na nga wala nay kinabuhi ang angkas niini nga babaye.
Bisan paman sa naangkon nga bun-og sa lawas sa usa ka tuig nga bata, naluwas kini og kasamtangang nagpaayo sa tambalan.
Pinaagi sa ID, giila ang driver nga si Jerome Sabal, lumulupyo sa Barangay Quiot, dakbayan sa Sugbo, samtang ang asawa niini nga nakabsan sa kinabuhi nailhan nga si Marilyn Mimis.
Gibana-bana nga anaa sa 200 metros ang gitas-on sa pangpang nga natagakan sa maong tangkal-tangkal nga motorsiklo.
