-Reymund Titong
NEGROS OCCIDENTAL, Philippines — Nagdangat na sa 26 milyones pesos ang kabug-usan nga ayudad ang nahatag sa mga pamilya nga na-apektuhan sa paglupok sang bulkan Kanlaon sang Hunyo 3.
Ang kabug-usan nga ayuda ang gin-kalkolar basi sa mga ginapanghatag sang mga nagkalain-lain nga mga ahensya sang gobyerno paagi sa opisina sang Department of Social Welfare and Development (DSWD).
Base naman sa report sang DSWD, P15.98 milyones na ang nahatag na bulig pinansyal sa 8, 032 ka pamilya kag P4.7 milyones naman nga balor sang foodpacks ang ginhatag sa 1,598 ka mga benipesyaryo, as of June 20.
Gina-kabig nga Lubos nga na-apektuhan sang paglupok sang bulkan ang banwa sang La Castellana, nga sa karun, may yara pa sang iban nga nagatinir sa pipila ka mga evacuation centers. Samtang, may pipila naman nga amat-amat na gina papuli.
Madumduman nga sang tinalikdan sang Hunyo 15, 1,386 ka mga pamilya ang nakabaton sang cash assistance nga nagabalor sang P10,000 kada pamilya, paagi sa programa sang DSWD nga Assistance to Individuals in Crisis Situation (AICS). *
