Gisuta na karon sa otoridad ang motibo sa nahitabo nga pagpamusil sa usa ka suspek ngadto sa sikad driver sa Phase 4 Zone 9 Capas Macanhan, Barangay Carmen ning syudad sa Cagayan de Oro.
Naila ang suspek nga si Ferdinand Daamo, 39-anyos, ulitawo kinsa responsabli sa pagpusil-patay sa biktima nga si Felmer Jhon Cabañeros 33-anyos polus molupyo sa maong dapit nga nakahiagom og samad pinusilan sa ulo ug sa gusok.
Una nang migawas sa imbestigasyon nga nag-uban ang duha nga nag-inom og ilimnong makahubog niadtong bisperas sa pasko.
Subay niini gibutyag ni Police Regional Office-10 Spokesperson Police Lt. Colonel Michell Olaivar nga dali sab nga milusad sa pursuit operation ang mga personahe sa Police Station 4 Carmen ug malampuson nga nasikop ang suspek.
Gamit sa suspek sa pagpamusil ang usa ka Caliber 45 pistol. Detinado na karon ang suspek ug pasakaan na sa tukmang kaso.
