Binalaan ng Department of Health o DOH ang publiko hinggil sa posibleng pagkakahawa ng monkeypox sa pamamagitan ng sexual contact o pakikipagtalik.
Sa isinagawang DOH press briefing, sinabi ni Dr. Beverly Ho na batay sa mga ginawang pag-aaral mula sa mga non-endemic countries, naisasalin ang virus sa pamamagitan ng pakikipagtalik sa mga taong positibo nito na nakitaan ng mga rashes sa katawan o mayroong open wounds.
Hindi umano ito kagaya sa COVID-19 na madalas na naisasalin sa pamamagitan ng hangin.
Kaugnay nito ay pinayuhan ng ahensya ang publiko na iwasan ang pakikipagtalik sa mga taong may mga rashes o mayroong sugat.
Maliban dito ay nararapat din umanong panatilihin ang kalinisan sa pamamagitan ng paghuhugas ng kamay, pagsusuot ng face mask at iwasan ang mga kulob na lugar o mahina ang ventilation.
