EMOSYONAL nga nagpasalamat ang usa ka ginang sa mga miyembro sa KaBrigadahan sa gikonsidera niyang ikaduhang kinabuhi.
Matud ni Richelyn Tongcoa, inahan sa tulo ka anak, dako iyang pasalamat human siya natabangan nga mapalitan og tambal sa sakit nga hyperthyroidism.
“Ang resita dili nako kaya paliton mao tong nangayo kog tabang sa brigadahan nahatag man nila dayon, kato nga time nagsuka nako og dugo naghuna-huna nako sa akong mga anak kung mabiyaan nako akong mga anak gagmay pa kaayo,” butyag ni Tongcoa.
Dugang ni Tongcoa kaduha na siya kahigayon natabangan sa gitawag niining ‘Hero’ nga mga miyembro sa brigadahan.
Giangkon niini nga dili nila kaya ang tambal alang sa iyang balatian tungod sa P200 matag-adlaw nga income sa bana gikan sa pagpang-harvest og tangkong ug udlot sa kamote.
Nagpasalamat usab si Domingo III nga anak ni Tongcoa sa kaayo nga gihatag sa mga miyembro sa KaBrigadahan sa iyang inahan.
“Sakit kaayo makit-an akong mama nga naglisod, matumba mulakaw ug nagasuka, salamat sa KaBrigadahan sa tinuod nga tabang sa amoa,” asoy ni Domingo III.
Nanawagan usab kini sa gobyerno nga lilion ang ilang kahimtang ug naglaom ang bata nga makabenepisyo sa social services aron makatabang sa ilang kalisod.
