CAMARINES NORTE- Arestado ang isang minero matapos makuhaan ng baril at iba’t- ibang uri ng pampasabog sa isinagawang operasyon ng mga pulis dakong alas 9:30 kamakalawa ng gabi sa Purok 4, Brgy. Malaguit, Paracale, Camarines Norte.
Kinilala ang naarestong suspek na si alyas “Enso”, 45 anyos, may asawa at residente sa nabanggit na lugar.
Bitbit ang search warrant na ipinalabas ng korte tinungo ng mga operatiba ng Paracale Police ang tahanan ng suspek kung saan nakuha dito ang apat na dinamita, isang rolyo ng detonating cords, limang piraso ng assembled ammonium nitrate na may time fuse at blasting cap at isang kalibre 38 pistola na kargado ng anim na bala at walang serial number.
Agad na ikinustodiya ang suspek kasama ng mga nakuhang ebidensya sa himpilan ng Paracale MPS para sa kaukulang disposisyon.
Kasong paglabag sa Republic Act 9516 o Unlawful Manufacture, Sales, Acquisition, Disposition, Importation or Possession of an Explosive or incendiary Device at RA 10591 o Comprehensive Firearms and Ammunition Regulations Act ang kakaharapin ng suspek.
