Atubangon na sa membro sa Militia ng Bayan sa New People’s Army (NPA) ang kasong gisang-at batok kaniya human nadakpan sa hiniusang puwersa sa otoridad diha sa lungsod sa Sison, Surigao del Norte pasado alas – 11:40 kagahapon sa udto.
Ang dinakpan mao si Jess Arlalejo alyas Doy-doy Arlalejo, 25 anyos, nagpuyo sa Purok-6 Brgy. Mayag, sakop sa maong lungsod.
Sumala ni Police Colonel Noel Espinoza, ang Provincial Director sa Police Provincial Office (PPO) Surigao del Norte, gikiha ang dinakpan sa kasong Attempted Murder.
Mahimo matod pang mahatagan sa temporaryong kagawasan ang akusado oras makabayad sa piyansa balor P120,000.
Kasamtangan, tanggong ang nahisgotan sa Sison Municipal Police Station.
