KALIBO, AKLAN—Ginpaandaman it Mines and Geosciences Bureau (MGB) 6 do mga LGU’s sa Western Visayas nga prone sa rain-induced landslides makarun nga una sa “typhoon season” do Pilipinas.
Suno kay Mae Magarzo, chief geologist it MGB 6, do publiko hay kinahangean nga mangin vigilante ag pirmi nga magbantay sa daeagan it tiempo eabi eon do mga naga-istar sa kabukiran nga may peligro sa pagguho it eogta ag sa mga low lying areas nga mataas do peligro sa baha.
Sa probinsya it Aklan, kaibahan sa mga ginakabig nga hig risk sa rain-induced landslide hay do mga banwa it Libacao, Madalag, Malinao, Ibajay, Tangalan, Nabas, Malay, Buruanga, Balete, ag Makato.
Samtang, agud nga malikawan nga may maduea nga kabuhi, ginlaygayan it MGB do mga local government units nga mangin preparado sa pagpabakwit it andang mga residente kung may matabong kalamidad. // SHERRY ANNE REUNIR-VIDAL
