Gin imbitahan ni Mr. Bayani Calizo, trainer it Football team sa may Camp Pastor Martelino sa Brgy New Buswang, Kalibo ro mga pamatan on nga gustong mag intra agud magkantiguhan sa nasambit nga football o soccer.
Sa pahayag ni Mr. Calizo sa BRIGADA NEWS FM KALIBO, nag umpisa ro anang pag-train sa football ku 2017 sa idaeum it unang proyekto it 1st mobile force it kapulisan sa Aklan.
Libre eang segun ro pag intra kara para magkantigu pero nagabatun man sanda it donasyon para sa mga equipment nga paga gamiton.
Kaabuan segun sa mga naga training kana makarun hay mga taga Brgy New Buswang pero bukas segun raya sa mga Aklanon nga gustong magkantigo sa nasambit nga hampang.
Adlaw-adlaw ro nasambit nga training ag sa maabot nga December 17 to 19, hay maga representa segun ro Aklan sa The Mariano Araneta Sr., Football Festival sa Barotac Nuevo, nga imaw ro football capital of the Philippines.
Sa makarun, sa Kids (boys) paeang hay 30 to 40 eon ro naga training samtang sa Kids (girls) hay 20.
Sambilog sa mga pagpahaum nga ginahimo nanda hay ro adlaw-adlaw nga pag praktis, ag disiplina sa sarili.
Nagpanawagan man si Mr. Calizo sa mga gustong magbulig sa andang club bangud kaabuan segun sa mga unga nga naga training hay gakalisud man sa pangabuhi. // ANN DESLENE SALAZAR
