-Reymund Titong
KABANKALAN CITY, Negros Occidental — Nakunsolta ang mga pumuluyo nga apektado sang P2-billion palm oil project sang Candoni antis pa man gin-pasugtan sang lokal nga panguluhan sang banwa antis nagsugod ang proyekto.
Sa interview sang Brigada Kabankalan kay Gatuslao punong Barangay Randy Dolloso, makapila na ka beses nga napatawag ang mga pumuluyo agud mahisgutan ang epekto sang proyekto sa ila, lakip na ang pipila ka residente nga posibli ma apektuhan ang ila pangabuhian.
Suno pa kay Dolloso, may yara sang masobra 300 ka mga pamilya ang yara naga istar sa sulod sang 6,652 ektaryas nga forestal land nga may yara sang Integrated Forest Management Agreement (IFMA) sa tunga sang Department of Environment and Natural Resources (DENR) kag Hacienda Asia Plantations, Inc. (HAPI) nag nagsugod pa sang 2009.
Bilang isa man ka Indigenous People (IP), ginpahayag ni Dolloso nga wala pa sila nahatagan sang National Commission on Indigenous People’s (NCIP) sang ila Certificate of Ancentral Domain Title (CADT), suli sa alegasyon sang Gatuslao Agro-Forestry, Banana, and Sugarcane Farmers Association (GABASFA).
Sa gin-patigayon nga assessment sang DENR kag banwa antis nadayon ang proyekto, sa masobra 6,000 ka ektaryas nga forestal land, yara lang sa 90 ektaryas ang may pananum parihas sang tubo, humay, pinya, kag iban pa nga mga produkto.
Dugang pa sang punong Barangay, wala sang mga tawo nga pahalinon sa ila mga lugar kun diin na tindog ang ila puluy-an bangud ini ang kasugtan sang HAPI kag banwa. *
