-Reymund Titong
KABANKALAN CITY, Negros Occidental — Sa linibo nga mga tinaga nga gin buy-an ni President Ferdinand Marcos, Jr., sa iya ika tatlo nga State of the Nation Address (SONA), sang Lunes, Hulyo 22, wala na mensyunar ang pagpasar niya sa Negros Island Region (NIR), lakip na ang mga butang nga ginasigahum sini sa tion nga ma-fully implement na ang NIR law.
Pila ka adlaw antis ang SONA, una na nga nagpahayag si Metro Bacolod Chamber of Commerce and Industry (MBCCI) chairman Frank Carbon, nga malakip sang presidente sa iya speech ang paghatag sang nagakaigo nga pagtamod sa operationalization sini.
READ: Presidente Marcos, nag-promisa nga palaparon ang mga dalan kag taytay sa NIR
Lakip man sa mga nagpahayag, amo si 6th District Representative Mercedes Alvarez, nga naglaum nga ma-mensyunar ni Marcos, ang ‘decentralization,’ ukon ang paghatag sang puder sa mga lokal nga panguluhan sa rehiyon, nga makahatag sang nagakaigo nga serbisyo sa mga pumuluyo nga indi na kinahanglan sang interbensyon sang gobyerno nasyunal.
Wala man nabalhag sang presidente ang iya mga gin-promisa sang nagbisita ini sa isla sang tinalikdan nga bulan nga tutokan sang iya administrasyon ang pagpalapad sang 42-kilometer Bacolod-Negros Occidental Economic Highway kag pag-construct sang 12 tanan ka panibag-o nga mga taytay sa rehiyon.
Apang ang tanan nga gin-panglantaw sang kalainlain nga mga lidres sa probinsya, wala may nabatian, gikan sa bibig sang presidente sa iya pagpatigayon sang SONA sa Batasang Pambansa Complex sa Quezon City.*
