LEGAZPI CITY – Pigseselebrar ngunyan na bulan nin Pebrero an National Cancer Awareness Month. Katakod kaini, tinawan-doon kan Department of Health (DOH) Bicol an saindang pigpapautob na manlain-laing health promotion activity.
Sa intrevista kan Brigada News FM Legazpi kay Julie Ann Granadino, an Regional Manager kan Cancer Control Program, sinabi niya na nagkakaigwa sindang obserbasyon kada bulan manungod sa mga klase nin cancer.
Pig-iimplementar ninda su boot an screening asin early detection sa mga komunidad asin an pagkondusir nin visual inspection via acetic acid, pap smear asin immunization para sa hepato-pancreato-biliary (HPB) asin HEPA B.
Mientrastanto, segun pa kay Granadino, basado sa datos kan taon 2020, cancer an pangaduwa sa may haralangkaw na kaso sa Pilipinas, partikularmente an breast cancer sa mga kababaihan asin lung cancer sa mga kalalakihan.
Tinawan-doon pa niya, an cancer bako death sentence alagad nabubulong ini. Bukas man an saindang opisina nganing magtao ki mga asistensya manungod digdi. | Brigada Intern MAUREEN BONANZA
