LEGAZPI CITY – Uminabot sa labi 3,000 an mga nagparehistro sa primerong aldaw kan voters registration sa Bicol Region kan nakalihis na Lunes.
Sa datos kan Commission on Elections (COMELEC) Bicol, nasa kabilugang numero na 3,349 an mga nagparehistro sa mga COMELEC offices sa rehiyon.
An mga lalaki an may pinakadakol na nagparehistro na may 1,713 mantang 1,636 an mga babae.
Sa anom na probinsya kan rehiyon, nangengenot an Camarines Sur na may pinakadakol na mga nagparehistro, kun sain uminabot ini sa 1,065; sunod an Albay na may 908; Masbate na may 471; Camarines Norte na may 364; Sorsogon na may 346 asin Catanduanes na may 195.
Pigklaro man kan COMELEC na bako sana an applikasyon sa pagpaparehistro an saindang pig-aakomodar, kundi kasarabay naman an pag-transfer kan saindang registration, reactivation, correction of entries asin iba pa.
