LEGAZPI CITY – Piglalaoman sa probinsya kan Albay an pag-abot kan mga upgraded quality hogs o maray na kalidad nin orig sa mga masunod na semana. Segun sa Albay Veterinary Office, plano nindang pakusugon asin padakulon an produksyon kaini.
Sinabi kan opisina, maabot na an walong mga grandparent boars bilang breeders hale sa Batangas na piglalaomang mapagayon nin lahi kan mga orig na aatamanon kan swine farmers sa probinsya. Itatao an mga ini nin libre kan gobyerno probinsyal asin Department of Agriculture (DA) sa laog nin tolong taon para mapakinabangan kan mga paraataman lalo na kan mga naapektuhan kan pagtama nin African Swine Fever sa rehiyon.
Kun magigirumduman, hinali na sa red (infected) zone an banwaan kan Tiwi sa Albay, asin ibinalik na sa pink (buffer zone).
