Daina E. Gerona
Masubo ang nawong, huy-hoy ang abaga sang kapin 80 ka mga mangunguma sa banwa sang Candoni nga nagpadulong sa munisipyo agud sa pagpangyo sang bulig sa alkalde angut sa gina-alegar nga paglapas sang Hacienda Asia Plantations Incorporated (HAPI) sa ila nga kasugtanan bag-o pa man ginsugdan ang Palm Oil Project sa Barangay Gatuslao.
Base sa pahayag sang pila ka mga presidente sang nagkalain-lain nga asosasyon sang mga mangunguma kalakip na ang grupo sang mga Indigenous People (IP’s) nga ginalapak ang ila diritso, ginguba ang ila right of way, ginguba ang ila mga ginakuha-an sang source of income kalakip na ang ila tubuhan, humayan, pinyahan kag iban pa.
Suno sa pahayag ni Carlito Catacata, isa ka sugarcane land owner nga bag-o pa man nagsugod ang amo nga programa nagpatigayon ang HAPI sang public hearing kag didto ginkasugtan nga indi pagtandugon ang ila mga pananum kag sa baylo, lain ang nagakalatabo sa karon.
Angut sini, pagkatapos sang malawig nga diskusyon sa tunga sang alkalde, MENRO, public attorney, mga tagreklamo kag katapo sang medya isa naman ang ginpasalig sang alkalde sang banwa Engr. Ray Ruiz sa mga mangunguma kag mga residente nga indi sila pahalinon ukon wala sang may magluntad nga dislocation, kag iya man sini karon pagatingwa-an nga ma istorya ang HAPI kag DENR -national agud nga mahatagan sang solusyon ang problema sang mga mangunguma.
