-Reymund Titong
KABANKALAN CITY, Negros Occidental — Daw manglampos sa kaugot ang pipila ka mga mangunguma bangud sa tinuig nga delayed nga proyekto sang National Irrigation Administration (NIA) sa syudad sang Kabankalan.
Sa interview sang Brigada News FM-Kabankalan kay Isidro Genol, board of director sang Kalibutan Society Incorporated, para sa iya ang pila ka kilometro nga irigasyon sang NIA halin sa Barangay Tan-awan padulong sa iban nga barangay sang syudad kag banwa sang Ilog, ang nagkabulig kuntani sa pagpahagan-hagan sang epekto sang El Niño phenomenon, apang asta sa karun, wala sa giyapon mihura sang proyekto.
Madumduman nga sa bulan sang Marso, una na nga ginpanawagan ni Kabankalan mayor Benjie Miranda sa NIA nga tapuson na ang nasambit nga proyekto nga nag-upisa pa sang 2012, sa diin siya pa ang kapitan sang Barangay Tan-awan.
Bangud sang kahalitan sang El Niño, nagdangat sa masobra P 40 milyones ang kahalitan nga dala sini sa sector sang agrikultura sa syudad.
Dugang pa ni Genol, dapat nga mag-invest pa gid ang gobyerno sa pag edukar sa mga mangunguma agud mangin handa ang mga ini sa ano man nga kalamidad kag indi masyado ma-apektuhan ang ila pag-panguma.*