NAGAPADAYON sa ilang negosyo ang mga litsunero sa Barangay Calumpang bisan kon naglisod sila sa ilang kakuhaan sa ilang supply pang litson.
Hulyo 31, 2022 adlaw nga Dominggo sa dihang gikomusta sa Brigada patrollers ang pipila ka litsonero sa National Highway, Calumpang ug makita nga nagapadayon ang ilang negosyo ilabi na sa adlaw nga Dominggo nga nagahiilira ang baligya nga litson baboy.
Sumala kay Ernesto Dela Vega, sinaligan sa usa ka litsonan, wala na sila nagakuha og supply sa backyard piggery sukad nga nigawas ang isyu sa African Swine Fever (ASF), apan mas mahal ang presyo ug tungod niini nabatyagan usab nila ang paghina sa ilang negosyo nga naapektuhan usab sa pandemya.
Sumala usab sa usa ka kumprador nga si Eric Lapiz wala na sila nagakumpra sa ubang lugar kay gibawal man, sa una sa abot sila sa Tampakan, South Cotabato apan sa karon sa Barangay Fatima, Calumpang ug sa Apopong sila nagakuha.
Gidugang ni Lapiz nga sa una dali lang mahurot ang iyang kinumpra matag semana tandi karon, ang ilang panghinaut nga unta sa dili magdugay matugotan na sila nga makakuha og supply sa ubang dapit aron nga barato usab nga presyo ang ilang mahatag sa ilang mga suki.
Nagduda usab si Lapiz nga sa sitwasyon adunay gustong mokontrol sa negosyo sa babuyan. I Ver Diazon
