LEGAZPI CITY – Kinumpirmar kan Commission on Election (COMELEC) Bicol na an mga kalalakihan an nangenot sa may pinakadakol na numerong nag-file nin Certificate of Candidacy (COC) para sa Barangay asin Sangguniang Kabataan Elections (BSKE) 2023 sa anuman na posisyon.
Segun sa komisyon, nasa 61.69% o 74,055 an nag-file na mga lalaki mantang 38.31% o 45,979 sana an mga babae.
Sa posisyon nin pagka-punong barangay, maabot sa 75.50% o 6,073 an lalaki, mantang 24.50% o 1,971 anmga babae, asin sa kabilugan nasa 8,044 na barangay chairman an nagsumiter.
Uminabot man sa 60,968 aspirants an nagsumiter para sa pagkakonsehal, 34.58% o 21,083 an mga babae, asin 65.42% o 39,885 an mga lalaki.
Mientrastanto, nasa 7,818 aspirants an nagfile bilang SK chairperson, 4,843 o 61.95% an mga lalaki, asin 2,975 o 38.05% an mga babae.
Siring man sa SK member na igwang 43,204 aspirants kun sain 23,254 o 53.82% an lalaki, mantang 19,950 o 46.18% an babae.
