Gina-engganyo kang Department of Trade and Industry (DTI) Antique provincial office ang mga ginikanan kag mga estudyante nga mag-avail kang “Balik Eskwela Diskwento” promotion bilang pagpanghanda sa pagbukas kang klase.
Ginpahayag ni DTI Antique provincial director Mutya Eusores, nga nag-umpisa ron ang promo sa diin ginpartisiparan kang apat ka mga daragkulan nga mga baraklan sa San Jose nga amo ang Antique City Square, BEY Enterprise, Gian’s Enterprises, kag Unitop General Merchandise.
Ang dya nga mga baraklan ang nagatanyag kang 5% asta 10% nga discount sa mga school supplies kaangay kang ballpen, pad paper, kag notebook kag nagatanyag man kang freebies kaangay kang sangka ballpen sa kada pagbakal kang tatlo ka notebooks.
Samtang, nagapadayon naman ang monitoring kang ahensya sa mga establishimento nga wara nagpartisipar sa promo agud masiguro nga dya ang nagasunod sa gihapon sa price guide kang DTI.
Magalawid naman ang dya nga back-to-school promo asta sa Hulyo 21.
