Pabor ang Punong Barangay sang Adlawan nga ipaidalom sa drug test ang mga magakandidato sa Barangay and Sangguniang Kabataan Elections 2023.
Ini ang nangin pahayag ni Kapitan Roberto “Maaw” Roldan sang mainterview sang Brigada News FM.
Suno kay Roldan, nga handa siya magpaidalom sa drug test agud makita sang iya mga pumuluyo nga wala siya nagagamit sang iligal nga droga.
Dugang pa sini, kun nagapamalibad ang isa ka kandidato nga magpadrug test nagapakita lang ini nga guilty ukon nahadlok.
Matandaan, nga sang damlag lang nagpaguwa ang Police Provincial Office 6 sang impormasyon nga may yara sang mga barangay officials ang ginaalegar imbolbado sa iligal nga droga ini matapos nga ginbuyagyag ni PNP Chief PGen Benjamin Acorda Jr. nga madamo sa Western Visayas.
Naglab-ot sa 76 ka barangay officials ang namonitor sa diin 20 ka punong barangay kag 56 ka kagawad ang naaresto, nagsungka kag padayon nga ginamonitor.
Apang, ginpanindugan naman sang Comelec nga wala malakip sa kuwalipikasyon ukon rekisitos ang drug test sa tion nga magfile sang certificate of candidacy ang magapadalagan sa Barangay kag SK election bangud ini ang wala sa layi. | Judy Ann Juare
