NAGAPASALAMAT ang mga nabiktima sa sunog sa Purok Lagang-lagang, Brgy.Bula kay nakadawat sila og daghang hinabang gikan sa managlahi nga grupo, Agusto 16 sa hapon.
Sumala kay Eugenio Roque, 70-anyos temporaryo sila nga nagpondo sa kanhi iceplant sa pamilya Congson nga sementado, may trapal nga dili sila ma-ambihan sa ulan ug gibutangan usab og suga sa pamilya Congson.
Nagapasalmat si Roque sa niabot nga mga hinabang ug usa na niini ang Brigada sa iyang gipasalamatan, apan ang mas daku nilang problema mao ang pagpatindog balik sa ilang balay.
Sumala usab kay Richard Rosendo, nagapasalamat siya sa tanang nitabang lakip sa Brigadahan nga naghatag ayuda, pagkaun sabon og uban pa.
Nanawagan usab si Rosendo nga kon si kinsa katong may ikatunol nga materyales para makatindog sila og balay ilang dawaton, sama sa lansang ug kahoy.
Samtang si Elma Hurado, usa usab sa biktima sumala niini nga aduna pa silay nadala pagawas kay konkreto man ang ilang balay ug wala dayon naugdaw mao nga nadayungan nila pagawas ang bag-o nila nga refrigerator ug ubang kagamitan.
Nagapasalamat usab kini sa mga tabang halos duha ka saku daw nga bugas ang iyang natigom apan ang ilang problema mao ang pagpatukod balik sa ilang balay.
Sa bahin sa Barangay Bula gikumperma ni Kagawad Antonio Talle nga nakahatag na og 20 ka sako nga bugas si Kapitan Nicanora Vargas isip pasiunang tabang sa barangay. ( Ever Diazon)
