WALAY problema sa Comelec Gensan kon palugwayan ang voters registration nga mahuman sa katapusan sa bulan sa Septembre 2021.
Sa pahayag ni Election Officer 4 Anwar Paidumama sa karon naga padayon ang ilang voters registration sa barangay ug sa mall, adlaw nga Lunes hangtud Miyerkulis sa Robinsons mall unya Huwebis hangtud adlaw nga Sabado sa sattelite registration sa mga lagyong barangay sa Gensan.
Sa Barangay San Jose niabot sa 969 ang nadawat nila nga aplikasyon samtang sa adlaw nga Lunes sa Robinsons mall niabot kini og 517, samtang ilaha usab balikan ang Barangay Ligaya kon itugot na sa City Health Office kay wala kini nahinayon kaniadtong milabay nga adlaw nga beyernis gumikan sa kaso sa COVID-19.
Samtang sa sugyot sa pipila ka grupo nga palugwayan pa ang pagrehistro wala matud pay problema basta aduna nay kamandoan sa Comelec National.
Panawagan usab ni Paidumama sa taga Barangay City Heights nga moadto sa mall aron magparehistro kay kasagaran sa nagpuyo dinhi mga empleyado ug adunay mga trabaho. ( Ever Diazon)
