LEGAZPI CITY – Kinumpirmar kan Public Safety Office (PSO) Legazpi City na uminabot na sa 37 mga behikulo an nasampolan o na-installan nin wheel clamp o tyre lock sa syudad huli sa illegal parking.
Ini an sinabi ni PSO Legazpi Chief Ret. Col. Rolly Esguerra sa Brigada News FM Legazpi.
Segun saiya, sa 37 ini, kadaklan digdi mga pribadong lunadan.
Pigklaro ni Esguerra kun nata sinda nagkokondusir nin massive clamping operation sa syudad, triple na an volume kan mga behikulo asin dai na ini kaya kan kapasidad kan mga tinampo.
Kasabay pa sa nagpagabat sa volume an numero kan mga trucks na piggagaramit sa quarry asin delivery.
Mientrastanto, pag na-wheel clamp an behikulo, may proseso man su boot nganing mapahali ini.
Segun kay Esguerra, may pigbubugtak na papel an team sa wiper asin yaon digdi an instruksyon sa pagkua nin citation ticket kasabay an contact number.
Pag nakua na an ticket, kaipuhan nindang magpasiring sa City Treasurer’s Office nganing magbayad kan multa.
Makalihis kaini, ipapahiling ninda sa team an resibo o OR hale sa nasambit na opisina, saka hahalion an wheel clamp.
Alagad, tinawan-doon man ni Esguerra, bako excuse an hazard light nganing makasalbar sa wheel clamping, huli ta piggagamit sana ini para sa mga emerhensya siring kan pag-unload ki pasahero.
