BICOL—Pinagirumdom ni alkalde Noel Rosal an mga kababayang Legazpeño na nakaresibe na nin kumpletong doses kan COVID-19 vaccine na ingatan asin ipa-laminate an saindang mga vaccination cards.
Ini bilang pag-antisipar sa mga masunod na lakdang kan gobyerno sa pagtataong prebilehiyo sa mga bakunadong indibidwal.
Enot kaini nagpaluwas nin Resolution Number 24-B an national IATF kun sain pigtutugutan nang magpasiring sainman na parte kan nasyun an mga personang nakaresibe na nin kumpletong shots kan COVID-19 vaccine.
Sigun ki Rosal, sa ngunyan na wara pang uniform card na pigtatao an gobyerno, rekognisado man suboot sa bilog na Pilipinas an mga pig-isyung vaccination card sa local level.
Magagamit ini kan mga inidbidwal na nakaduwang semana na makalihis na mabakunahan nin second dose kan COVID-19 vaccine.
Pagtataong doon ni Rosal, pig-oorolayan na ini sa national IATF partikular an pag iisyu nin uniform card na dae basang na mapepeke. Mahahampang suboot sa mahigot na penalidad an sisay man na mabalong pekeon ini.
Sa presente, igwa suboot sa saindang abiso na ipaotob na ini sa local level mantang pigpaplantsa an iba pang mga katakod na panundan manungod digdi.### || SLM
