LEGAZPI CITY – Nairehistro sa Albay an dakulang pagbaba sa porsyento kan mga kaakian na dai pa tatao magbasa asin magsabot sa nakalihis na school year 2023-2024 sa implementasyon kan 8-week Learning Recovery Program.
Sa datos na pigpresentar ni Department of Education (DEPED) Bicol Regional Director Gilbert Sadsad, ini huli sa isinagibong duwang parteng Modified Comprehensive Rapid Literacy Assessment sa labi 50,000 mga estudyante sa Grade 1 to 3, kun sain an porsyento kan mga full refresher o mga dae pa talaga tatao sa letter sounds, rhyming words asin sentences reading na parte kan enot na assessment iyo an nagbaba nin 16.27 % huli ta hale sa 23.83% kan Beginning of school year (BOSY) nasa 7.56% na sana ini kan End of School Year (EOSY).
Mantang pag-abot naman sa ikaduwang assessment manungod sa reading fluency and comprehension, an mga emerging o mga nakakabasa alagad dai pa tataong marhay an buminaba nin 19.58% huli ta hale sa 29.99% kan BOSY nagin 10.41% na sana ini kan EOSY.
Mientrastanto, sa top 10 na school district sa division na may pinakadakol asin nagkontribwer sa 80% kan mga konsideradong emerging students nangengenot digdi an Daraga North, suminunod an Tiwi, Polangui North, Guinobatan East, Libon West, Oas South, Jovellar, Daraga South, Malinao asin Libon East.
