MALIPAYONG gibalita sa opisyal ug mga sakop sa Metro Gensan Transport Cooperative nga ilaha na nga nakuha ang Notice of Selection (NOS) gikan sa opisina sa Land Transportation Franchising and Regulatory Board (LTFRB) Region 12 sa Route 3.
Sa paghinabi sa 89.5 Brigada News FM Gensan sa Manager sa MGTC nga si Orly Sabelita gikumperma niini nga tinuod ang makita sa social media post nga nakuha na nila ang Notice of Selection sa usa ka rota nga gikan sa Central Public Market padulong sa Barangay Katangawan.
Ang maagihan sa mga sakyanan nga mobyahe unya ang Santiago Boulevard, J Catolico Avenue ug Nursery Road, Lagao.
Gidugang ni Sabelita nga 35 ka Unit ang gitugot nga mobyahe nga sakyanan sa route 3 unya 15 ka Unit sa Electric Jeepney ang ilang gi- aplayan sa Bangko ug kon walay kakulian sa bulan sa Oktubre makabyahe na sila sa mao nga rota.
Mokabat usab sa P1.750 million ang ilang kwarta nga nagsilbing bond sa 15 ka unit nga ilang gi-order sa supplier.
Sa karon ang ilang ginahan-ay mao ang garahe sa Barangay Katangawan gumikan usa ka rekositos sa usa ka rota ang kaugalingon nga garahe sa mga unit kay dili mosugot ang taga bangko nga naga-apruba og loan sa
e-jeep units kon walay klarong garahe.
Tungod sa mao nga katikaran mokabat na sa tulo ka rota ang biyahian sa Metro Gensan, una ang Route 5 unya ang Route 6 ug dayon ang Route 3. I Ver Diazon
