WALA nalipay ang mayor sa GenSan sa serye sa kamatay nga gakahitabo sa dakbayan. Matud ni Mayor Ronnel Rivera, gimanduan niya si PCol. Gilberto Tuzon, hepe sa GenSan City Police Office (GSCPO) sa paghatag og hustisya sa pamilya sa mga namatyan sa dakbayan tungod sa pagpamusil. Gituki na usab niini sa mga pulis ang tanang kuha sa CCTV sa mga establisimento aron makatabang sa pagresolba sa krimen.
Samtang human sa hitabo, gipaalerto ni PCol. Gilberto Tuzon, director sa GenSan City Police Office (GSCPO) ang mga sakop. Naglatag og mga checkpoints sa nagkadaiyang bahin sa siyudad ug naglusad sa Oplan Kabalikat. Biyernes sa gabii nahitabo ang sunod nga pagpamusil nga miresulta sa pagkamatay sa magsuon ug pagka-angol sa usa katao. Sa GenSan, base sa datus sa kapulisan naa na sa 30 ka insidente sa pagpamusil ang narekord asa sa maong pagpamusil duha ang swerteng nakalikay sa kamatayon. Una nang, gibutyag sa mayor nga maayo ‘performance’ ni Tuzon sa pagbantay sa seguridad sa GenSan. (Richel Gubalani)
