Naghatag sang pahayag si Pres. Roxas Mayor Receleste Escolin matapos naglapta sa social media ang mga video sini kun sa diin may yara sang pagbinaisay sa tunga nila sang ginaalegar anay Municipal Planning and Development Officer nga si Mr. Luther Beldia.
Sa interview sang Brigada News FM Roxas City kay Mayor Escolin, iya ginpahayag nga pagkatapos magpangtakod sang Christmas lights sa palibot sang plaza, naglabay siya sa isa ka convenience store kun sa diin nagatambay ang duha ka empleyado sang munisipyo kaupod si Beldia rason nga iya ini ginpalapitan kag ginpamangkot kun masanag man ang lugar?
Suno diri, nagsabat sa iya ang duha ka empleyado apang si Beldia ang nagatulok sa iya sang malain gani ginpamangkot niya man ini “Mr. Beldia, manami man magtambay sa masanag nga lugar?” wala ini ginsabat sang anay MPDO sa baylo ginmulay siya sini kag ginduro-duro.
Bangud sa natabo, ginkaingit ini sang alkalde kay daw kaangay gina-insulto kag wala siya ginarespeto bilang amay sang banwa.
Aminado man ini nga wala siya nakapugong rason nga nagbuya man ini sang malain nga tinaga apang suno diri tawo lamang siya kag normal lang nga mag-react sa kasubong sadto nga insidente.
Gintuad man ni Escolin, nga antes paman ang natabo nga pagbaisay sa plaza madamo na sang pabati-bati nga ginapost sa social media si Beldia nahanungod sa iya.
Dugang pa sini nga maayo man ang relasyon nila sadto ni Beldia apang sang ini ang nag-resign didto na nag-umpisa ang pagpangtirada sini.
Nagpalab-ot man sang mensahe si Escolin sa mga pumuluyo sang President Roxas sa padayon nga pagsuporta kag pagsalig nga ginahatag sa iya kag lauman nga pag-umwad sang banwa tubtob nga matapos ang iya termino. | Judy Ann Juare
